Sual: Deyilənə görə ailəmə cadu edilib və bu mənə pis təsir göstərir. Belə bir məsələdə nə iş görülməlidir?
Cavab: Belə şeylər insanın ürəyini sıxır. İnsan öz-özünü bu narahatlıqdan xilas etmək istəyir.
Yeri gəlmişkən, qeyd edək ki, Qurani-Kərimin xüsusiyyətlərindən biri də onun oxunduqca insana rahatlıq verməsidir. Çünki Quran insanlar üçün bir rəhmət və şəfadır:
“Ey insanlar! Sizə Rəbbinizdən bir öyüd-nəsihət, ürəklərdə olan dərdlərə bir şəfa, möminlər üçün bir hidayət və rəhmət gəlmişdir“. ((Yunus, 10/57.))
“Biz Qurandan elə bir şey endiririk ki, o, möminlər üçün şəfa və mərhəmətdir. Zalımların isə ziyanını artırır”. ((İsra, 17/82.))
Məlum olduğu kimi Qurani-Kərimin başqa adlarından biri də Zikrdir:
“O Zikri biz endirdik və onu əlbəttə ki, biz qoruyacağıq’. ((Hicr, 15/9.))
Qurani-Kərimi eyni zamanda Zikr adlandıran Allah Təala qəlblərin ancaq və ancaq bu zikri oxumaqla rahatlıq tapacağını bildirir:
“(Onlar) İman gətirənlər və qəlbləri Allahın zikri ilə sükunətə çatanlardır (onların qəlbləri rahatlıq tapıb aram olmuşdur)”. ((Rəd, 13/28.))
Yuxarıdakı ayələrdə də göstərildiyi kimi Quran oxumaq insanı daxilən sakit olmağa sövq edir, ona şəfa və mənəvi rahatlıq verir. Buna görə də müsəlman bir insan Quranı həmişə başa düşərək oxumalı və ondan öyrəndiklərini öz həyatına tətbiq etməlidir ki, hər bir pislik və xüsusilə insanların törətdikləri bəd əməllərə qarşı möhkəm bir qoruyucusu olsun.
Saytımızın materiallarından istifadə edərkən mənbə göstərilməlidir. Müsəlmanlar © 2004 Bütün hüquqları qorunur.
